माझिया मळ्यात विठ्ठल भरिला
पानाफुलांच्यासवे तो हसूनी डोलला!!
केली मशागत सोपी गाऊनी आरती
विठु माझा आनंदून तिथे प्रकटला!!
ओली आई चिंब झाली न्हाली भक्तिरसे
तिच्यात माझा सावळा रुजूनी राहिला!!
बीज पेरले भक्तीचे पाणी दिले साधनेचे
कोंबकोंबातून विठूराया अंकुरला!!
रोपे तरारली त्यात कणसे फुलली
दाणा दाण्यातून  विठु पाझरु लागला!!
पुरी झाली आता सेवेची साधना
विठुराया अंतर्बाह्य सामावून गेला!!
अन्न खाऊनी तृप्तीने देह भरियेला
बापरखुमादेवीवरू "विठ्ठल" सेविला!!