अमृतकण वेचताना भाग १

 

नमामि गंगे!

महाकुंभ हे एक स्वप्न आहे...भारतीय परंपरा व संस्कृतीला पडलेलं... आम्ही तर या परंपरेचे पाईक त्यामुळे हा विषय जिव्हाळ्याचा असावा यात तीळमात्र शंका नाही.त्यातून आमचे  International Center for Cultural Studies म्हणजे जागतिक प्राचीन परंपरांचा वारसा सांभाळण्याचं वसा घेतलेलं केंद्र! आपण सर्व एक आहोत ही घोषणा देतच हे सर्व काम सुरु आहे.त्यामुळे १४४ वर्षांनी येणारी ही महाकुंभाची पर्वणी याचि देही याचि डोळा अनुभविण्याची व संस्कृती पूजनाची संधी अनेकांनी व्यक्तिशः घेतली तर अनेक संस्थांनीही या संधीचं सोनं केलं आहे.त्यात ICCS सुद्धा सहभागी होत आहे.

त्रिवेणी संगमावरील स्नान,पूर्वजांचे स्मरण,देवी-देवतांचे दर्शन,साधूंच्या आखाड्यांची प्राचीनता व इतिहास,हौशे,नवशे,गवशे अशा सगळ्यांचाच हा मेळा!

मनातसुद्धा नव्हतं आलं की या गर्दीचा भाग होऊन जावं! पण तरीही ICCS च्या बैठकीत समजलं की इथे एक चर्चासत्र होणार आहे ज्यात संस्थेचा सहभाग असेल अन्य समविचारी संस्थांसह.मग आम्हीही तयारी सुरू केली.

विमानाचे दर सर्वसामान्यांच्या आवाक्याबाहेर,रेल्वेची आरक्षणं आयत्यावेळी मिळणं दुर्लभ! मग आमच्या अहोंनी ठरवलं की आपली जीप घेऊनच हा सारा प्रवास करूयात!

आणि आम्ही अगदी कमी कालावधीत जमेल तशी तयारी करुन निघालो आहोत... आज रात्री भेडाघाट...

समृद्धी महामार्ग हे वरदानच त्यामुळ प्रवास सोपा झाला.आशुतोष आणि आमची मैत्रीण स्वाती या दोन चक्रधरांनी वाहनाचं सारथ्य केलं आहे आज आणि मी निवांत बसून ,बदलणारा प्रदेश,माणसं,परिसर आणि 'फुलले पलाश रानी'चा आनंद डोळ्यात आणि मनात भरून घेत होते.

मध्य प्रदेशात जसा आपण प्रवेश करतो तसं ठिकठिकाणी महाकुंभभक्तांसाठी फलक लावून सोयी करण्यात आलेल्या दिसल्या.महाकुंभ संपण्याचे दिवस जवळ येत आहेत तरीही लोकांचा उत्साह अफाट आहे.गाड्या भरभरून माणसांचे जत्थेच्या जत्थे येथे येत आहेत.

पुराणांमधे वाचलेला तो समुद्रमंथनाचा प्रसंग, ते देव,ते असुर आणि हाती आलेला अमृताचा कुंभ दुष्ट प्रवृत्तींपासून वाचवत भरारी घेतलेला तो वैनतेय... या सार्‍यांची प्रतिरूपं उद्या तिथे पोहोचून पाहण्यास मी उत्सुक आहे...

डाॅ.आर्या जोशी