बदलणारे दिवस

सूर्य उगवतो रोज मावळतोही रोज
पण प्रत्येक दिवसाचं वेगळंच असतं गुज!
बदलणारे दिवस निसर्गाचा खेळ
ऊन पाऊस वारा झेलत पुढे जाते वेळ!
आषाढ श्रावणात दिवस पिवळं ऊन नेसून येतो
क्षणात अचानक कधीतरी पाऊसशाल पांघरून बसतो!
कोजागिरीचं चंद्रबिंब बदलून टाकतं दिवसाला
वेध लागतात त्या संध्येचे शरीराला अन् मनाला!
ग्रीष्माच्या काहिलीत  दिवस बदलून जातो
हिरव्यागार छायेखाली काहीवेळ पसरतो!
बदलणारे दिवस पाहत राहते मी
त्या दिवसांच्या विभ्रमात शोधत राहते ऊर्मी!