तुळुनाडूतील जनवेदाचा अभ्यास करताना

 आनंद घ्यायचा अधिकार प्रत्येक माणसाला आहे,नव्हे तो द्विपद आणि चतुष्पदांनाही आहे.भारतीय संस्कृती असा आनंद बहाल करते सण उत्सवांच्या निमित्ताने.

भारताच्या प्रांतोप्रांती जपली जाणारी लोकसंस्कृती आणि त्या संस्कृतीमधील विविध संकल्पनांमधून रचला जातो "जनवेद".

अशाच एका जनवेदासंबंधी काम करण्याचा अर्ज करावली विकी समूहाकडून विकीमीडिया फौंडेशनकडे आला.संस्कृती आणि धर्म असा विषय असल्याने आमच्या समन्वयकाने तो सर्वात आधी माझ्याकडे सोपवला.

वाचताना लक्षात आलं मला, यांना जे काही करायचं आहे त्याचं साधर्म्य कोकणातील लोकसंस्कृतीच्या अगदी जवळ जाणार आहे...

मग सुरू झाला माझा या गटासह माध्यमावर संवाद.मी या समूहासह एक विकी कार्यकर्ता आणि अभ्यासक म्हणून काम करू शकते असं मला लक्षात आलं आणि मी फौंडेशनकडे शिष्यवृत्ती अर्ज केला.प्रश्नोत्तरांची मालिका पूर्ण होऊन माझं अनुदान मंजूर झालं आणि काल मी मंगलोरच्या पुढे असलेल्या छोट्या गावात येऊन विसावले.

हा सारा माझा प्रवास पुढील चार दिवस करावली विकी समूह सदस्यांसह होणार आहे.कन्नड भाषेत करावली याचा अर्थ coastal region.

आम्ही काय करीत आहोत,त्याची फलश्रुती काय हे सारं हळूहळू उलगडत जाईलच.

बह्मपुत्रेच्या आठवणी अजून मनात ओल्या असताना मी आज नेत्रावतीच्या कुशीत येऊन विसावले आहे.... 

सांगत राहीन ही गोष्ट लोकसंस्कृतीची,लोकांच्या मनात दडलेल्या श्रद्धांची,मानवतेची,नव्याशी नाळ जोडताना न विसरल्या गेलेल्या प्राचीन परंपरांची...