सुवर्णवर्षावाने भिजला देववाणीचा माथा
परंपरांनी, संस्कारांनी रचिली सुंदर गाथा!
गुरूकुलातील ऋषि- ऋषिकाही, आशीर्वच देती
सप्तसिंधुही वाहत उसळत, यशोगीत गाती।
राष्ट्रभक्ती अन् सुविचारांनी रंगुन गेली कथा
सुवर्णवर्षावाने भिजला देववाणीचा माथा। १
रामचरित्रे जगत् व्यापी ती,दिव्यत्वाचे अमोघ संकुल
संस्कारांचे पुनर्जागरण,तत्वविचारी विद्वत्मंडल
जुन्या- नव्याचा मेळ घालिती श्रद्धा अन् आस्था
सुवर्णवर्षावाने भिजला देववाणीचा माथा।२
दीप उजळला तेजाचा अन् केले आरात्रिक्य
परस्परांचे कर करी जोडत साधीत गेले ऐक्य
उलगडली मज याच मंदिरी धारा आणिक राधा
सुवर्णवर्षावाने भिजला देववाणीचा माथा।३
डाॅ.आर्या आशुतोष जोशी
No comments:
Post a Comment